Lleoliad ac Hygyrchedd
Mae Barcelona wedi ei lleoli ar arfordir y Môr Canoldir yng ngogledd ddwyrain Sbaen. I’r gogledd ac i’r de o Barcelona ceir cyrchfannau arfordirol o bwys megis Lloret de Mar a Salou.
Taith ddwy awr mewn awyren yw Barcelona o Lundain ac ychydig mwy o feysydd awyr rhanbarthol y DU.
El Prat yw’r enw ar brif faes awyr Barcelona ac mae 12 cilomedr o ganol y ddinas. Adeiladwyd rhedfa newydd yn ddiweddar i drafod y cynnydd yn y nifer o hediadau.
Mae’r holl brif gwmnïau hedfan yn cynnwys British Airways ac Iberia yn hedfan i El Prat. Hefyd EasyJet. Mae Ryanair yn hedfan o’r DU ond yn defnyddio meysydd awyr Girona i’r gogledd a Reus i’r de. Golyga hyn fod teithwyr Ryanair yn gorfod teithio am awr mewn bws i gyrraedd canol y ddinas.
Un o’r prif resymau pam fod Barcelona yn gyrchfan mor boblogaidd am wyliau byr i ymwelwyr o’r DU yw fod modd hedfan yno o gynifer o feysydd awyr yn y DU. Mae nifer o’r teithiau hyn gyda chwmnïau hedfan rhad ac mae’r teithiau yn gymharol rhad.
Teithiau hedfan i Barcelona
Un rheswm dros boblogrwydd ac apêl Barcelona fel cyrchfan ar gyfer gwyliau byr yw argaeledd teithiau awyr o gynifer o feysydd awyr rhanbarthol yn y Deyrnas Unedig. Mae gan y ddinas dri maes awyr: y prif un yn El Prat, yn union y tu allan i’r ddinas, Reus, taith awr i’r de a Girona, tua’r un pellter i’r gogledd. Mae’r prif gwmnïau hedfan yn hedfan i El Prat, a hefyd EasyJet. Mae Ryanair yn hedfan i Reus a Girona. Mae’r tabl isod yn darlunio’r dewis o feysydd awyr rhanbarthol y Deyrnas Unedig y gall ymwelwyr hedfan ohonynt i Barcelona ar Ryanair ac easyJet, heb sôn am y cwmnïau awyr eraill.
| easyJet – El Prat | Ryanair - Girona | Ryanair - Reus |
|---|---|---|
| Belfast | Glasgow | Glasgow |
| Lerpwl | Newcastle | Lerpwl |
| Newcastle | Durham Dyffryn Tees | Birmingham |
| Dwyrain y Canolbarth | Doncaster | Llundain Luton |
| Llundain Luton | Manceinion | Llundain Stansted |
| Llundain Stansted | Dwyrain y Canolbarth | |
| Llundain Gatwick | Llundain Stansted | |
| Bryste | Llundain Gatwick | |
| Bournemouth | ||
| Bristol | ||
| Newquay |
Mae gan Barcelona wasanaeth rheilffordd da. Mae’n bosib cyrraedd Barcelona o ddinasoedd eraill Sbaen ar y trên ac fe geir trenau uniongyrchol i Baris. Hefyd, mae’r system draffordd Ewropeaidd yn golygu ei bod yn hawdd gyrru i Barcelona er y buasai hyn yn cymryd cryn dipyn yn fwy o amser.
Mae gan Barcelona system drafnidiaeth gyhoeddus gyda gwasanaeth trenau danddaear (metro) sy’n rhedeg drwy’r dydd. Mae tocyn sengl yn costio un Ewro. Ceir 11,000 o dacsis cofrestredig ac mae bysiau twristaidd yn ddull da o weld y ddinas a’r cyffiniau.
Gweithgaredd 2
Chwiliwch am Barcelona, Girona, Montserrat, Reus, Salou, Lloret De Mar, Andorra, a’r ffin â Ffrainc.