| Mae’r credoau am Akhirah, a elwir hefyd yn Ddydd y Farn, yn cael effaith fawr ar Fwslimiaid heddiw gan fod Mwslimiaid yn dadlau bod yr hyn y maent yn ei wneud mewn bywyd yn effeithio’n uniongyrchol ar yr hyn sy’n digwydd iddynt mewn bywyd ar ôl marwolaeth. Er enghraifft, mae pob cofnod o weithred, a bwriad, wedi’i gofnodi gan ddau angel a byddant yn cael eu rhoi yn ôl iddynt yn eu llaw chwith neu eu llaw dde (chwith ar gyfer uffern a de ar gyfer y nefoedd). |
Mae mwy o bwyslais mewn Islam ar bwysigrwydd ymarfer i arddangos ffydd nag sydd ar y ffydd ei hun. Er enghraifft, dilyn y pum piler, bod yn rhan o’r Ummah, mynd i’r mosg, yn hytrach na dim ond credu yn Nydd y Farn a bywyd ar ôl marwolaeth.
|
| Pe na bai Mwslimiaid yn credu yn Nydd y Farn heddiw mae’n bosibl na fyddent yn cael eu cymell i ddilyn y llwybr syth. Felly mae cred o’r fath yn gwbl angenrheidiol ac, o ganlyniad, o’r pwys mwyaf mewn Islam. |
Nid yw ‘cred’ ar ei phen ei hun yn dda i ddim heb ymarfer, gan mai wrth ei weithredoedd y bernir Mwslim. Yn yr un modd, nid yw cred neu weithred yn dda i ddim heb y bwriad cywir.
|
| Pan fo credoau a dysgeidiaethau Mwslimaidd yn cael eu gweld yn gyflawn, cred yn Nydd y Farn yw sylfaen eu credoau. Mae Mwslimiaid yn pwysleisio pwysigrwydd paratoi i gyfarfod Allah ar ddiwedd eu hoes, o ran ofn ac o ran disgwyl yn eiddgar. Rhaid sicrhau mai’r cyfarfod hwn ag Allah yw’r cysyniad pwysicaf mewn Islam. |
Byddai rhai’n dadlau bod arddangos ewyllys Allah drwy fyw bywyd Mwslimaidd da yn bwysicach na gobeithio am fywyd ar ôl Dydd y Farn.
|
| Ceir dadl nad yw’n bosibl bod yn Fwslim heb gredu yn Nydd y Farn, oherwydd ei bod yn gred Fwslimaidd allweddol i’w derbyn ac yn rhan hanfodol o fod yn Fwslim. Mae cred yn Nydd y Farn hefyd yn rhoi ystyr i fywyd ac yn egluro dioddefaint. |
Er nad yw’r gred yn Nydd y Farn a bywyd ar ôl marwolaeth yn amherthnasol, mae angen persbectif a chydbwysedd wrth edrych ar Islam er mwyn gweld bod pethau eraill yr un mor bwysig neu’n bwysicach i Fwslimiaid heddiw, er enghraifft, esiampl Muhammad o foesoldeb, gofalu am y tlawd a sut i drin merched.
|
| Mae’r Qur'an yn addysgu am Ddydd y Farn. Mae llawer o gyfeiriadau yn y Qur’an at y diwrnod hwnnw ac at fywyd ar ôl marwolaeth a chyfeirir at hyn hefyd yn yr Hadith; felly mae’r ddysgeidiaeth yn rhan o ddatguddiad Allah yn ei gyfanrwydd. I gloi, os hynny, gellid dadlau mai dyma’r cysyniad pwysicaf mewn Islam. |
Mae cymdeithas Prydain yn gynyddol seciwlar ac ymddengys ei bod yn esgeuluso ac yn gwrthod syniadau o’r fath fel ofergoeliaeth felly gallai hyn effeithio ar gredoau Mwslimaidd, wrth i fwy a mwy o bobl ddewis peidio â chredu yn Nydd y Farn neu hyd yn oed mewn bywyd ar ôl marwolaeth. Byddent yn dadlau nad dyma’r peth pwysicaf mewn Islam oherwydd y peth pwysicaf mewn gwirionedd yw bod yn Fwslim da.
|