6a Canolfannau Celfyddyd
Beth yw eich dealltwriaeth chi o 'sinemâu canolfannau celfyddyd'? Ydych chi'n gwybod pa fathau o ffilmiau maen nhw'n eu dangos?
- Gwahanol i sinemâu prif ffrwd fel sinemâu aml-sgrin.
- Mae'n bosibl y byddan nhw'n dangos ystod wahanol o ffilmiau.
- Bydd y rhain yn gyfuniad o ffilmiau – sinema'r byd, cyllideb isel, ffilmiau amgen heb fod yn brif ffrwd, ochr yn ochr â ffilmiau arbenigol mwy o Hollywood.
- Efallai bod yr apêl at fath gwahanol o gynulleidfa – cynulleidfa hŷn 35+, dosbarth canol yn bennaf, wedi cael addysg – er bod y rhan fwyaf o sinemâu arbenigol yn anelu at ddangos ffilmiau a chynnal digwyddiadau ar gyfer teuluoedd a gwylwyr iau.
- Llai na sinemâu aml-sgrin o ran nifer y sgriniau.
- Llai o apêl at farchnadoedd iau yn gyffredinol?
- Mae 'canolfan celfyddyd' yn enw cyffredin ar beth sydd bellach yn cael ei ddisgrifio'n ffurfiol fel sinema 'arbenigol' – sinema sy'n gwasanaethu amrywiaeth o gynulleidfaoedd arbenigol (yn hytrach na chynulleidfa brif ffrwd, gyffredinol).
6b Ffilmiau Arbenigol Saesneg eu Hiaith
Edrychwch ar y tabl hwn sy'n seiliedig ar erthygl o Sight and Sound mis Chwefror 2014 gan Charles Gant. Roedd yn siarad am beth roedd yn ei alw'n 'ffilmiau arbenigol Saesneg eu hiaith'. Mae'r rhain yn ffilmiau a gafodd eu dangos mewn sinemâu arbenigol (canolfannau celfyddyd), er eu bod yn ffilmiau prif ffrwd, yn aml gyda sêr enwog yn ymddangos ynddyn nhw. Yn sgil eich gwaith ymchwil i sinemâu canolfannau celfyddyd arbenigol, efallai y byddwch chi wedi gweld bod y mathau hyn o ffilm yn aml yn cael lle blaenllaw ar yr amserlen, er bod pob amserlen yn cynnwys ffilmiau annibynnol hefyd.
Amlinellwch y rhesymau pam mae rhaglenwyr sinemâu canolfannau celfyddyd, arbenigol, yn dangos y ffilmiau hyn. (Mae'r ffigurau a roddir yn dangos y refeniw gan sinemâu aml-sgrin/prif ffrwd, yn ogystal â sinemâu arbenigol/canolfannau celfyddyd.) Efallai y bydd angen i chi chwilio am wybodaeth am unrhyw ffilm sy'n anghyfarwydd i chi.
| FFilm | Refeniw (hyd at Chwefror 2014) |
|---|---|
| Life of Pi | £29,928,205 |
| Gravity | £25,763,353 |
| Captain Phillips | £15,805,169 |
| The Great Gatsby | £15,737,351 |
| Django Unchained | £15,736,884 |
| Philomena | £10,470,225 |
| Lincoln | £8,757,912 |
| Quartet | £7,303,670 |
| Blue Jasmine | £5,120,999 |
- Mae bron pob un o'r ffilmiau wedi'u hanelu at ddemograffeg hŷn, 35+.
- Dim ond dwy ffilm sy'n rhai 3D – Life of Pi a Gravity – ond mae'r ddwy yn ffilmiau mwy difrifol na'r ffilm cysyniad uchel, sinema aml-sgrin, gyffredin, felly maen nhw'n fwy tebygol o ddenu cynulleidfa 'canolfan celfyddyd'. Roedd Life of Pi yn nofel a enillodd wobr Booker, sydd wedi'i seilio ar realaeth hudol. Caiff Gravity ei hystyried yn ffilm sy'n edrych ar fywyd a marwoldeb yn fwy difrifol na ffilm fel Transformers.
- Mae rhai'n cynnwys sêr enwog, gydag actorion uchel eu parch (Dench, Hanks, Day-Lewis, Blanchett, Seymour-Hoffman), sydd wedi ennill gwobrau Oscar ac sydd â statws uchel yn y diwydiant.
- Mae cyfarwyddwyr yn chwarae rôl bwysig yma hefyd wrth ddenu cynulleidfa'r canolfannau celfyddyd (Lee, Cuaron, Greengrass, Luhrmann, Tarantino, Allen).
- Mae llawer o'r ffilmiau hyn wedi cael eu henwebu ar gyfer gwobrau mawr, ac wedi ennill y gwobrau hynny, a gallai hyn fod yn rhan o'r atyniad hefyd.
- Gall yr elw a wneir trwy arddangos y ffilmiau hyn gefnogi'r sinemâu i arddangos mwy o ffilmiau annibynnol, nad ydyn nhw, o bosibl, yn denu cynulleidfaoedd mor fawr.
