Mae gan ŵyl ffilmiau nifer o swyddogaethau. Yn gyntaf, gellir ystyried gŵyl ffilimiau fel rhywle y gall ffilmiau gystadlu â ffilmiau eraill. Yn y rhan fwyaf o achosion, mae rheithgor yn penderfynu ar y ffilmiau gorau, a gellir defnyddio hyn wrth hyrwyddo'r ffilm ar ôl yr ŵyl.
Yn ail, mae gwyliau ffilm yn galluogi adolygwyr i weld y ffilm ar ei phwynt arddangos cynharaf. Gall hyn fod yn ddefnyddiol iawn wrth greu cyhoeddusrwydd ar gyfer ffilm na fydd y cyhoedd, o bosibl, yn ei gweld am rai misoedd – gan adeiladu cyffro ymysg y gynulleidfa. Wrth gwrs, mae'n gallu cael effaith wrthgyferbyniol os yw'r ffilm yn cael adolygiadau gwael.
Yn drydydd, maen nhw'n rhoi cyhoeddusrwydd i ffilmiau canolfannau celfyddyd. Fel arfer, mae'r rhain yn ffilmiau sy'n cystadlu, a bydd y gwobrau maen nhw'n eu hennill (neu beidio) yn creu diddordeb cynnar yn y ffilmiau.
Yn bedwerydd, mae gwyliau'n darparu marchnad i gynhyrchwyr ffilmiau bach 'werthu' eu ffilmiau i ddosbarthwyr.
Ac yn olaf, maen nhw hefyd yn dod yn rhywle i ddangos ffilmiau Hollywood mawr am y tro cyntaf – fel The Great Gatsby (Cannes 2013) a Gravity (Venice 2013).
Mae llawer o wyliau y gellir eu henwi yma – Berlin, Cairo, Cannes, Goa, Karlovy Vary, Locarno, Mar del Plata, Montreal, Moscow, San Sebastián, Shanghai, Tokyo, Venice, a Warsaw. Mae'r rhain i gyd yn cael eu hachredu gan Ffederasiwn Rhyngwladol Cymdeithasau Cynhyrchwyr Ffilm (International Federation of Film Producers Associations) yng nghategori prif ffilmiau cystadleuol. Y prif Wyliau Ffilm yn y DU yw Gŵyl Ffilmiau Llundain (LFF: London Film Festival) a Chaeredin. Mae Toronto yn ŵyl ffilmiau ddefnyddiol iawn hefyd.
Yn UDA, mae Gŵyl Ffilmiau Telluride, Gŵyl Ffilmiau Sundance, Gŵyl Ffilmiau Austin, South by Southwest yn Austin, Gŵyl Ffilmiau Tribeca yn Efrog Newydd a Gŵyl Ffilmiau Slamdance i gyd yn cael eu hystyried yn wyliau arwyddocaol ar gyfer ffilmiau annibynnol.
5b Adroddiadau Gwyliau Ffilm
Darllenwch y ddwy erthygl o safle ffilmiau ar-lein The Guardian trwy glicio ar y cysylltiadau. Maen nhw'n adrodd hanes Gŵyl Ffilmiau Venice 2013. Roedd Gravity wedi cael llawer o gyhoeddusrwydd yn sgil ymgyrch farchnata fawr yn barod, a dyma'r ffilm a oedd yn agor yr ŵyl.
Trafodwch y cwestiynau.
1. Adolygiad Xan Brooks o Gravity
Sut mae'r adolygiad byr hwn gan Xan Brooks o fudd i (a) cynulleidfaoedd a (b) cynhyrchwyr a dosbarthwyr?
Ar gyfer cynulleidfaoedd, mae'n rhoi golwg gyntaf ar y ffilm ac yn cynnig barn gadarnhaol iawn amdani hefyd.
Mae'r adolygiad ar 29 Awst, ac nid oedd dyddiad rhyddhau Gravity yn y DU tan 8 Tachwedd – dros ddau fis i greu cynnwrf.
Mae'n adolygiad o ffynhonnell sydd wedi'i hen sefydlu, felly mae ganddo hygrededd.
Gall ysgogi safbwyntiau llafar ymhlith cynulleidfa bosibl y ffilm.
Gallai agor gŵyl bwysig fel Venice roi hygrededd i'r ffilm ymysg cynulleidfa ehangach y tu allan i sinema aml-sgrin hefyd.
2. Cyfweliad (Clooney, Cuaron a Bullock)
Rhoddir rhywfaint o bwyslais ar y cyfarwyddwr.
Mae'r rhan fwyaf o'r cyfweliad yn trafod technoleg y ffilm.
Mae'n canolbwyntio rhywfaint ar y sêr.
Mae'n ddiddorol nad yw agwedd 3D y ffilm yn cael ei chrybwyll rhyw lawer.
Mae Clooney'n ystyried y ffilm fel ffilm Bullock.
A yw'r clip yn sbwylio'r ffilm rhywfaint trwy ddatgelu rhai o'i chyfrinachau technolegol?
5b Seremonïau Gwobrwyo
Mae'r tymor gwobrau'n bwysig iawn i fyd y ffilmiau, am amrywiaeth o resymau.
Enwebwyd Gravity am 11 BAFTA ac enillodd 6, gan gynnwys y Ffilm Brydeinig Orau a'r Cyfarwyddwr Gorau.
Enwebwyd Gravity am 10 Oscar ac enillodd 7, gan gynnwys y Cyfarwyddwr Gorau.
Rhowch resymau pam gallai'r gwobrau hyn fod yn ddefnyddiol ar gyfer (a) cynhyrchwyr a dosbarthwyr a (b) cynulleidfaoedd?
Cynhyrchwyr a dosbarthwyr
Mae'r gwobrau hyn yn cynyddu cyhoeddusrwydd ar gyfer y ffilmiau cyn gynted ag y caiff yr enwebiadau eu gwneud. (Wrth gwrs, mae gwobrau'n cael eu sefydlu i farchnata ffilmiau ac i greu galw cyffredinol am ffilmiau.)
Mae llawer o ddadlau yn y cyfryngau ynglŷn â'r enwebiadau hyn yn y cyfnod cyn noson y seremoni wobrwyo.
Gellir defnyddio'r enwebiadau ar y posteri i hyrwyddo'r ffilm ymhellach.
Mae ffilmiau sy'n cael eu hystyried, wrth iddynt gael eu cynhyrchu, yn ffilmiau a allai gael eu gwobrwyo yn dueddol o gael eu rhyddhau yn hwyr yn y flwyddyn, ar ôl cyfnod ffilmiau blockbuster yr haf, er mwyn iddyn nhw gael eu hystyried yn y seremonïau. Mae'r ffenestr theatrig hon yn bwysig iawn.
Mae dosbarthwyr yn gwario llawer iawn o arian yn rhoi hysbys i'w ffilmiau er mwyn cael pleidleisiau ar gyfer eu ffilmiau nhw. Gwelir rhywfaint o hyn yng nghyhoeddiadau'r diwydiant – Variety a Screen International.
Os yw'r ffilm yn ennill, gellir addasu'r posteri os yw'r ffilm yn dal yn y sinemâu.
Gall ennill yn seremoni'r Oscars yn arbennig roi bywyd newydd i ffilm, a golygu ei bod yn cael ei dangos am fwy o amser mewn sinemâu. Enillodd Gravity wobrau yn yr Oscars ar yr un pryd â'i dyddiad rhyddhau ar DVD/Blu-ray yn y DU, felly roedd yn gyfle i hyrwyddo'r ffilm am ddim.
Gall ffilm lwyddiannus o ran gwobrau fod yn hanfodol ar gyfer rhyddhau ffilm y tu allan i'r theatr – bydd y pris ar gyfer gwerthu i'w dangos ar y teledu yn cynyddu, bydd mwy o ddiddordeb ar gyfer VOD a DVD/Blu-ray.
Cynulleidfaoedd
Gallai llawer o enwebiadau greu diddordeb mewn ffilm yng nghanol ei chyfnod yn y sinema, a denu mwy o bobl i'w gwylio.
Mae'r cyffro hwn yn hanfodol wrth gadw'r ffilm ar feddwl y gynulleidfa.
Mae'n bosibl y byddan nhw'n ceisio gwylio'r ffilm yn y theatr, neu'n ei rhoi yng nghefn y meddwl i'w gwylio yn ddiweddarach y tu allan i'r theatr.
Mae gwobrau'n rhoi marc ansawdd ar ffilmiau, ac mae'n bosibl y bydd hyn yn apelio at rai aelodau o'r gynulleidfa.
Roedd y rhan fwyaf o'r gwobrau a enillodd Gravity yn y BAFTAs a'r Oscars yn ymwneud â'r dechnoleg yn y ffilm – a dyma oedd prif bwynt gwerthu'r ffilm, ynghyd â pherfformiad Sandra Bullock, ac felly bydd yn helpu i sicrhau bod y gynulleidfa'n ystyried hyn yn beth da.
